ឥណ្ឌូណេស៊ី៖ បេក្ខភាពប្រជែងតំណែងប្រធានាធិបតីថ្មី និងជារដ្ឋមន្រ្តីការពារជាតិឥណ្ឌូណេស៊ី លោក ប្រាបូវ៉ូ ស៊៊ូបីអាន់តូ (Prabowo Subianto) បានពង្រឹងការនាំមុខសាជាថ្មីក្នុងការស្ទង់មតិ ក្រោយបេក្ខជនប្រធានាធិបតីបានបង្ហាញមុខជាសាធារណៈសម្រាប់ការដេញដោលមតិតាមទូរទស្សន៍ នៅមុនការបោះឆ្នោតដែលនឹងឈានចូលមកដល់នៅថ្ងៃទី១៤ ខែកុម្ភៈខាងមុខនេះ។

ការស្ទង់មតិមួយដែលបានធ្វើឡើងពីថ្ងៃទី២៣ ដល់ថ្ងៃទី២៤ ខែធ្នូដែលចេញផ្សាយដោយ Indikator Politik Indonesia នៅថ្ងៃអង្គារនេះបានបង្ហាញថា លោក Prabowo ដែលកំពុងឈរឈ្មោះជាមួយប្រជែងជាមួយលោក Gibran Rakabuming ជាកូនប្រុសរបស់ប្រធានាធិបតីបច្ចុប្បន្ន លោក Joko Widodo ទទួលបានសំឡេងគាំទ្ររហូតដល់ទៅ ៤៦,៧ភាគរយ។

Indikator ក៏បានបង្ហាញលទ្ធផលដែរថា អតីតអភិបាលខេត្ត Central Java លោក Ganjar Pranowo គឺជាគូប្រជែងធំបំផុតរបស់លោក Prabowo Subianto ដោយបន្តតាមពីក្រោយជាមួយលទ្ធផលគាំទ្រ ២៤,៥ភាគរយ ខណៈអតីតអភិបាលក្រុង Jakarta លោក Anies Baswedan ទទួលបានសំឡេងគាំទ្រ ២១ភាគរយពីការស្ទង់មតិនេះ។ ដោយឡែក ការស្ទង់មតិពី Kompas បានបង្ហាញលទ្ធផលស្រដៀងគ្នានេះ ដោយលោក Prabowo បានទទួលសំឡេងគាំទ្រចំនួន ៣៩,៣ភាគរយ លោក Anies Baswedan ទទួលបានសំឡេងគាំទ្រ ១៦,៧ភាគរយ និងលោក Ganjar Pranowo ទទួលបានសំឡេងគាំទ្រ ១៥,៣ភាគរយ។​​

គួរបញ្ជាក់ថា បើតាមការគ្រោងទុក កិច្ចពិភាក្សាដេញដោលមតិចំនួន ៣ផ្សេងទៀតនឹងត្រូវបានធ្វើឡើងមុនពេលការបោះឆ្នោតឈានមកដល់នាខែកុម្ភៈខាងមុខនេះ៕